يا سحابهْ قْدرَها فوقْ السحاب
لا يصيبك باسْ يا بحر الندى
تحت غيثك كل أنواع الشراب
الحيا لاهلك وموت لمن عدى
عذبه لجارك وللعادي عذاب
كم سقيت المعتدي طعم الرّدى
يا يد فيها الشجاعه ما تهاب
كل غالي لاجلها يعله فدى
تحملين الضرّ عنا والصعاب
وتدفعين الضيم لين آخرْ مدى
في سطور المجد خطّيتي كتاب
كل حرفٍ فيه بالعز ابتدى
كم مسحتي دمعةٍ تشكي مصاب
وكم رحمتي من له الضرّ اهتدى
من كريمٍ يملك قلوب ورقاب
كلّ صوت يصبح لصوته صدى
تختلف لاراء على أمر الصواب
بس عنكم تتفق حتى العدى
إنت زايد إنت الأول والمجاب
وانته الحامي إذا خوفٍ بدى
الشعر يرفع لذي مالهْ جناب
والشعر يخفض عزيزٍ سيّدا
بس مع زايد تغيرّ في الحساب
لأن باسمه الشعر عزّ ولهْ شدا
لك تغني لى يزينها الخضاب
ويعلك السالم ْعلى طول المدى
Subscribe to:
Post Comments (Atom)
No comments:
Post a Comment